مكعبات شريف الحكيم // عجبى كمان وكمان

[شريف الحكيم]

السلام عليكم ورحمة الله وبركاتة
الاعزاء
اسمحو لى ان اهديكم تلك المكعبات التى كتبتها فى فترة غيابى الماضية
وسوف استكمل الكتابة بها معكم هنا
مكعبات عجبى كمان وكمان
هى فكرة مستوحاة من رباعيات الرائع صلاح جاهين
ربما يأتى يوم وتكون امتداد لروائعة
م و د تى
شريف الحكيم


يا ابن ادم عملت اية فى دنيتك
الدنيا زى الشجرة تلاقيها فى سكتك
اروى شجرتك خير تطرح محبتك
سعتها نام ورتاح تستاهل جنتك
عجبى
******
انسان ! عارف انك مخلوق وضعيف
موجود فى الدنيا بدون أذن او تصريح
هتعمل اية فى دنيتك لجل بكرة تستريح
خروجك منها اكيد بسبب ومن غير تصريح
عجبى
******
قصأيص ورق فى الهوا طيرين
انسان وعمرة ورق فى الخريف واقعين
لوكنت ساكن فوق القمر او نجمتين
لابد يوم تنزل للحساب رايحين
عجبى
*****
الدنيا كورة وخطوط طول وعرض
عليها زرع ودواب وارض
امشى عليها يا ابن ادم شمال او يمين
فى لحظة واحدة الكل هيكون معدومين
عجبى

********
شريف الحكيم

[شريف الحكيم]

يا أبن أدم خيالك واسع وفية الجهل
لوشفت مرة الحقيقة تموت والموت سهل
ما بين الحقيقة والخيال خطوة
لو شفت الحقيقة تضحك و تموت عن جهل
عجبى
****
أنسان وجانى جواب مالوش عنوان
قلبى اترجف وشعر راسى من خوفى وقف
فتحته لقيت حروف ومعناها كلام
هى الدنيا كدة جواب والناس حروف بدون عنوان
عجبى
*****
يا ابن ادم مش مهم أن كنت غنى ولا فقير
او كنت نايم فوق الارض او ع الحرير
شوف عملك زى الطير طالع لفووووووق
واخرتها جنة او حطب وسط السعير
عجبى
****
عايز تسكن دنيا من غير لا ايجار ولا تمليك
اعرف حجمك تلقى نفسك ساكن قصر
وأن مرة شفت الدنيا كبيرة عليك
أحمد ربك وأجرى بسرعة وصلى العصر
عجبى
***
شريف الحكيم

[شريف الحكيم]

الدنيا كدا زى الكتب حروف مكتوبة
تعمل صح ينكتب .. تعمل غلط برضو ينكتب
حط الدنيا تحت رجلك ترفعك فوق
وان شغلت نفسك بيها تركبك وتبقا تحت
عجبى
****
ليه لما بنفرح نفتح أيدينا وننظرفوق
ولما نحزن نضمها وننظر تحت
خليكم زى السحاب والريح
طاير فوق والمطر ينزل تحت
عجبى
****
أنده .. ما تنده على خبر بكره
أهو كله شغل بنى أدمين
بكره تلاقى اسمك مجرد خبر
ويوم الحساب ينادو عليك للحساب يا مسكين
عجبى
****
أمشى ما تمشى وافرح وراسك فوق
لا ليك ولا عليك خليك أنسان عادى
خلى الدنيا تحتك وان كانت جبل عالي
وان كان ولا بد تنزل .. أنزل بس وقت الموت
عجبى
****
شريف الحكيم

[شريف الحكيم]

افهم حكمة وأعمل بيها
تلاقى نفسك حروف معانيها
واخسر جولة وقول هتعلم
واقوم وأنهض مستبشر بيها
عجبى
****
لما تمشى فى الطريق عليك بغض البصر
اوعى ترافق صديق تمشوا تعكسوا البشر
اوعى بكون الدين يادوب صلاه وصيام
دا الدين كما قال النبى معاملة طيبة وسلام
عجبى
****
أياك تفتكر رمضان اكل وشرب ونوم شهر العسل
رمضان عمل وعبادة وابتعاد عن الكسل
اعمل و صوم رمضانك حق مثل النبى
واياك تغرك غرور الحياة وتبقا انتا أبو الكسل
عجبى
****
انسان ! عارف ايه معنى العيد
انك تصنع فرحة بعد القيام والصوم
والزكاة تدفعها بفرحة فى ايد محروم
اوعاك تبخل بيها لتكون انتا من العيد محروم
عجبى
****
شريف الحكيم

[احمد الجزائري]

كلمات في غايت الروعه بارك الله فيك اخي شريف ارجو ان تفيدنا اكثر

[سنابل العطاء]

رائع أيها الشريف الحكيم

بارك الله فيك

و مرحباً بعودتك لبيتك الثاني

و إن شاء الله تكون عودة بلا غياب

سعداء بوجودك

[ابراهيم صندوقه]

صح لسانك

جميل ما قدمت

[شريف الحكيم]

الاخ الكريم احمد الجزائري
وفى مرورك الكريم بركة
م و د تى
اخوك شريف الحكيم
***********
لما خرجنا للحيــاة صوتنا وبكينا
وصرخنا بعلو حسنـا للكل حوالينا
رجعونا بطن أمنا بلاها دية دنيا
يمكن عشان ساعتهـا بالغدر حسينا
عجبى
*****
انسان يا انسان يا انسان يا انسان
سارح لوحدك وفى دنيتك حيران
انهض واضحك واكتب حروف اسمك
انسان وماشى رحلتة وضحكتة عنوان
عجبى
*****
انا انسان ومش باين فى صورة متلغبطة
محتاج حد يفكنى واشوف نفسى و روحى
اترينى تايه ومش شايف وطالعة روحى
انسان وعايش وحدتة والكون زحاااااام
عجبى
****
أملأ كاسك واشرب فى صحتك
وانسى همومك وأهرى فى جدتك
ياجدع فوق دشرب الخمر حرام
اخرتها ندم وطريق دخول للنار
عجبى
/ شريف الحكيم /

[شريف الحكيم]

الاخت الكريمة سنابل العطاء
بارك الله فيكى وفى كلماتك وتشجيعك لنا
دمتى ودامت ايامك بالسعادة وطاعة الرحمن
م و د تى
شريف الحكيم

******
العنوان سعادة
********

إنسان يا إنسان ... لا يهمنى أصلك
أن كنت غنى ولا فقير
لابس ألف تاج او طر من الطراطير
أزرع بذور علمك وأرويها حب من قلبك
وأسعى فى دنيتك بمحبة ربك .. واجنى ثمارك خير
عجبى
*******
الدنيا كتاب وانت اللى ماليها
اكتب حروفك سعادة ومالكش دعوة بيها
خليك جملة مفيدة وأسكن فيها
السعادة كلمة حلوة .. أحفظ معانيها
عجبى
******
أكتب أسمك ورسم سطر
انتا حروف مرصوصة فوق ع الخط
ممكن تبقا سعيد جوه حروف وممكن تانى تكون خجول مكسوف
ويا ويلك لو كنت حزين مليان بالخوف
عجبى
*******
عارف أمتى أكون مبسوط
ويكون الحب اللى ربطنا بشكل خيوط
واكتب كلام سهل من غير نحو ولا تصريف
وارسم خيوط عمرى بكفى وأبقا أبو بدم خفيف
عجبى
/ شريف الحكيم /

[شريف الحكيم]

الاخ الكريم ابراهيم صندوقه
مرورك يسعدنى
كل التقدير لك
م و د تى
شريف الحكيم
******
العنوان دنيا
*****
يا دنيا ورد وفل وكلها الوان
اببض احمر اصفر اخضر ولونى بنهم تاه
فيكى ناس بلون وناس بلونين
ودلوقتى بقينا فى زمن ناس بعشر الوان
عجبى

*****
ارسم واكتب فى القصص من شمال ويمبن
منتا كمان قصة جوه الكتاب مكتوبة يا مسكين
يتكون فيها البطل او خيال على الحيط
والنهاية نفرحلك او نفرح فيك .. يا ؟
عجبى
****
أنا شفت ناس كتير وبروزها على الحيط .. بلا لازمه
وناس تانى فى برواز الحياة موزونة ومتزنة
شوف بقا انتا نفسك وبروازك راح تبقا مين
يتكون برواز جوه قلوبنا .. يتكون ع الحيط
عجبى
*****

تايه في زحمة دنيــتك شغلاك بمشاكلها
تخاصمك تكره دنيتك تصالحك تحن لها
لا في مره دام الــــهنا وتــروق وتتعكر
ودايما تقول يا ســـــــلام ربك يعدلها
عحبى
/ شريف الحكيم /

[ينبوع]

ياسلام على كلامك أخي شريف الحكيم
عجبني هذا المقطع أظنك جزء منها
واسمك حاملها أو كلك فيها

افهم حكمة وأعمل بيها
تلاقى نفسك حروف معانيها
واخسر جولة وقول هتعلم
واقوم وأنهض مستبشر بيها
عجبى

عودة ميمونة مباركة علينا أرجو في المستقبل تعمل مدونة خاصة بك

[شريف الحكيم]

الاخت الكريمة / ينبوع
دائما حضورك له مكانة ودلالة
منكى نستمد الدعم لنواصل الطريق
دمتى ودام حضورك ومرورك الكريم مثلك
م و د تى
/ شريف الحكيم /
*********
عنوان اليوم / انسان دمه خفيف
*********

من غير لمو اخذة ولا تكليف
عارف انك فيك الهزل والتخاريف
طب ليه تزعل من النصف التانى
خلى عواطفك تسبق غضبك قبل ما ترحل .يا خفيف
عجبى

*******

لو مرة اخرج من هدومى
وارمى معاها أحزان همومى
غاوى اعبر باسلوب تحروووووووور
ومن غير هدومى وزنى يبقا --- خفيف
عجبى

*******

عارف أية معنى الضيق
وان الخوف اللى سكنا يبقا صديق
يجى الليل وحلمك يجرى وراه
تبقا اكيد بتحلم وحلمك مش لقيه -- يا خفيف

عجبى

*******

امسك قلمك وارسم فى وشوش البنى أدمين
هتلاقى قصادك الف وش ومحتارين
وشوش بريئه ووشوش جريئه
وشوف بقا نفسك وشك راح يطلع مين -- يا خفيف

عجبى

/ شريف الحكيم /

[شريف الحكيم]

العنوان // الرضا
******

ان كنت ساكن وسط البلد او فى الريف
عارف اللى ما بين الشتا والصيف ربيع وخريف
وان نمت أحلم وأحلامى مجرد تخاريف
اكل وز وبط ... أو نص رغيف

-- راضى

عجبى

*****

إن كنت صاحى ولا نايم من غير صوت
عارف انك جوه نفسك بتصرخ بأعلى صوت
الدنيا زى اليد علينا مضغوطة
اكيد هنبقا عصير وبالصبر مبسوطة -- راضى
عجبى

*******

أرسم نفسك ويا الموج .. بالتباشير
وانزل واغطس وقول البحر جواه ريح
واركب لوحك وامشى وغنى معاه
وقول لولا الحر ما كنت رسمت البحر .. بالتباشير

-- راضى

عجبى

******
فى مثل بيقول لا اسمع لا ارى لا اتكلم
*

أسمع ما تسمع مهو كلة كلام فى كلام
لا كلام الحكام سمع ولا حتى المحكومين
يبقا اية يكون العمل والكل رغايين
انا هعمل زى المثل قالوه الصينين -- راضى
عجبى

**********
/ شريف الحكيم /

[شريف الحكيم]

العنوان // فكر فى اخرتك
****

انسان وواقف على الشط اللي جف من العـــــدم
شايف أماني بتنطفي وبتنهـــــــــــــــــدم
وقفت نفسى عن الكلام وانفلت مني الجــــــــــواب
يا هل ترى أخر الحكاية ندم ولا أمل

عجبى
****

وطلعت فوق السما باصص على الملكوت
شوفت الخلايق عدم تستنى أو بتفوت
ولمحت فوق فى الفضا حبة كلام مكتوب
الأولى كلمة نعم وآخرها كلمة موت

عجبى
*****

في مستشفى زحام وناس زهق المرض منهم
ودكاترة من غير قلوب القرش جننهم
وابن بيجري بابوه على كرسي عشان تعبان
لحقوا الاب لكن الابن مات منهم
عجبى

*****

الدنيا لما بتاخدك تلهيك بحلاوتها
وأيام شبـــــابك تعدى بكل زهوتها
وفجأة تلاقي الحلاوة بقت مرار في مرار
وتيجي عليـــك الحياة ومعاها قسوتها
عحبى

****
/ شريف الحكيم /

[ينبوع]

[شريف الحكيم]

http://share.muslmah.net/up/11/11068/01354442720.jpg
الاخت الكريمة / ينبوع
دائما كنت اتحدث مع نفسى عن الانبهار ونادرا ما انبهر
فى لحظة واحدة وجدت نفسى فى غاية الانبهار من رابطك فى الاعلى
والفضل كان لله عز وجل ولكى
ادعو الله ان يكون النجاح والتوفيق طريقَ لكى
خالص شكرى وتقديرى على ما قمتى به من عمل فى تلك الصوره
م و د تى
/ شريف الحكيم /
**************
العنوان / تسابيح
*******

خليك فى الدنيا طير وسبح فى الهوا
وافرد جناحاتك للناس بالامان
ووقت الفجر والمغرب اقراء كتابك تسابيح
وحاول تبقا نبى او حتى تبقى مسيح
عجبى
******
سبح تسبيحك بنغم منشود

هتلاقى الحزن يمر يفوت

ووعاك تشكى لحد جوانحك

واعرف ان الله موجود
عجبى
*****

سبح ربك واقول انا فارس من زمان الانبياء
وابقا عابد فى محرابك قدام عيون الاولياء
واعزف كلامك نغم ورتل بكلام ربك
واطلب شهادة واقول يارب قوينا
عجبى
*****
انسان يا انسان خليك بين التسابيح رحال
فارس وشايل جوه نفسك سبحتك
واعزف حروفك وسط الكلام تسابيح
واجعل ايمانك قوى وسط العواصف والريج
عجبى
/ شريف الحكيم /

[ينبوع]

شكرا أخي شريف على كلامك الرائع
وتلك الصورة كانت لها حكاية بقيت أكثر من أسبوع محضراها
لكن لجم قلمي
وبقيت هكذا حتى انتفضت كلماتك الرقراقة وقلت هي دي
ستكون لي عودة مرارا ببطاقات كلما سنحت الفكرة

[شريف الحكيم]

الاخت العزيزة ينبوع
دائما مرورك ينير الموضوع
جعل الله لكى نورا فى كل مكان تتواجدين فيه
تقديرى لكى دائما اينما كنتى
م و د تى
/ شريف الحكيم /
*******
العنوان / اعجاب
سجاده فوقنا وفيها نجوم من صنع الله

ننطــق نقــول سبــحان الله
سجاد البشر خيوط وقش وعمرها هش
ننطـق نقـول سبـــحان الله
عجبى
******
لما دخلنا الحياة غطونا بمتر قماش
سمعنا ضـــحكهم علينا وضحك الناس
ولمـا خرجنـا منهـا غطونـا بمتر قمـاش
سمعنا البكاء علينا وبكاء الـنـاس
عجبى
******
انســــان قلبـــــه ورق طاير مع النسمات
يطيــــــر معاه حلمه مشدود بالخوف
تهبط ورقه قلبه وحلمه يروح لبعيد
يـدعى يقـول يـارب برحمتـك ابقـا سـعيـد
عجبى
*****
انسان يا انسان يا انسان يا انسان
فاكر لما كنت تغنى وسط الحروف
مرة بحب ومرة بشوق وبخوف

يطلع خيال حرفك تخاف منه - تقول يارب
عجبى
/ شريف الحكيم /

[سنابل العطاء]

انســــان قلبـــــه ورق طاير مع النسمات
يطيــــــر معاه حلمه مشدود بالخوف
تهبط ورقه قلبه وحلمه يروح لبعيد
يـدعى يقـول يـارب برحمتـك ابقـا سـعيـد
عجبى


ملف مرفق 17

ملف مرفق 17



سلمت يمينك

أخي الكريم

[شريف الحكيم]

الاخت الكريمة / سنابل العطاء
سلمتى من كل شر
م و د تى
/ شريف الحكيم /
*************
العنوان / صورة من الحياة
***
اصرخ وثور خليك جسور بكلمة حق
وان ما ثورت تبقا قتيل ميت بحق
لغة الحوار ما بنا ايمان من مولاك
واتعلم حوار ربك مع جن وانس وملاك
عجبى
****
تركب دماغك يابن ادم توجعك
تشوف خيالك حصان للخلف يرجعك
خلى توكلك على اللى خالقك وابدعك
تلاقى الهم يبعد والحزن كمان يودعك
عجبى
*****
لما بنام بموت موت بس خفيف
واحلم يشتاء اوصيف وربيع وخريف
ابنى قصور فى خيالى واجرى انام فيها
اصحى الاقى نفسى فى دنيتى وتايه بيها
عجبى
****
انسان يا انسان يا انسان يا انسان
خليك جميل الروح وللوفاء عنوان
طه الحبيب - ص - زمان قال لنا
ربك جميل والجمال من حب ربنا
عجبى
/ شريف الحكيم /