الفترة اللي فاتت قُدر ليا اتعرف علي مجموعه أمهات جديدة مش بتحضن اولادها من غير سبب ولما سالتهم ليه قالوا مش عارفين بس مبتجيش فرصة! ومفيش سبب نحضنهم عشانه !ماهما كبروا خلاص !

انا اتصدمت واتخضيت يعني ايه مش بتيجي فرصة نحضن ولادنا ?! يعني ايه بيعدي يوم متحضنش او تحضني ابنك فوق ال 100مرة مثلا اه والله 100مرة ?! ليه سايبنها للصدفة احنا ورانا ايه يعني اهم من كدا

الحضن دا معجزة حقيقة لازم نعلمها لولادنا.
لازم ميكبروش عليها.
لازم يتعلموا الحضن اللي من غير شروط من غير اسباب من غير مانستني منهم حاجة ولا هما يستنوا مننا حاجة

احضنوهم وانتوا مبسوطين ووانتوا فرحانين واطمنوا بحضنهم.
احضنوهم وهما بيجروا وهما بيلعبوا
اطلبوا حضنهم كل شوية.

الحضن لغة حب قوية جدا ميحسش بقيمتها الا اللي اتحرم منها وميقدرهاش الا اللي مشافهاش ولا حس بيها.
الحضن تفاصيل كتير اوي
خلوا حضنكم لولادكم زي ماكانوا فالرحم كدا دفا وامان من غير شروط
الحضن سمو ورقي للروح حقيقي بعيدا عن اثاره الجسدية وقد ايه هو بيأثر عالمناعه والمخ وبيخلي هرمونات السعادة تزيد وبيخلي جسمنا يهدي من العصبيه وغيره .
بس حقيقي الحضن حاجة كده معجزة بكل تفاصيله الحضن هو الحاجة اللي بتثبت وتاكد لولادنا ولحبايبنا اننا بنحبهم انهم موجودين ومؤثرين في حياتنا انهم مُنتمين لينا لحضننا لقلبنا.

الاطفال مش بتفهم بالكلام علي قد مابتفهم بالفعل مش هيفهموا كلمه بحبك بس بيفهموا الحضن اوي بيفهموا الوقت اللي بنستقطعه من حياتنا ليهم
مش هيفهموا بشتغل عشانك بس بيفهموا حضنك اوي ليهم كأب.
مش بيفهموا اهمية المذاكرة وغيرها بيفهموا وجودك جنبهم اكتر بكتير.
مش بيفهموا يعني اكل وشرب بس بيحسوا الحضن عشان فطرتهم وخلقتهم لسه مش مشوهه لسه مأثرش فيها الدنيا ووجعها.

احضنوا ولادكم واحضنوا بعض قدام ولادكم حسسوهم اهميه دا خلوكم مرايا ليهم يقلدوكم ويشوفوا نفسهم زيكم في وم من الايام.

بفكركم وافكر نفسي دايما كل يوم احضنوا ولادكم كتير الصبح لما تصحوا وبالليل قبل ماتناموا ووسط اليوم وكل دقيقة تشوفوهم قدامكم من غير سبب من غير سبب من غير سبب.
علموهم يفضلوا يحضنوا ويفضلوا حنينين كفايه بقي ازواج مبيحضنوش كفايه ستات مشاعرها بارده كفايه مراهقين بيدورا علي حضن يترموا فيه
كفايه بنات وولاد بيدورا علي حضن برا البيت.
كبروهم بعيطوا في حضنكم ويفرحوا في حضنكم.

احنا اللي محتاجين حضنهم كمان اكتر منهم بكتييير عشان حضنهم لينا بيكون من غير شروط من غير تشوه لما بيحضنوا بيحضنوا حب فينا مش خوف ولا طمع ولو وصلت انهم يحضنوا عشان طالبين حاجة مننا او عشان خايفين مننا يبقي العيب فينا مش فيهم.

رجعوهم للفطرة.
رجعوهم للحضن وخلوهم يكملوا بيه حياتهم.

منقول